Silai chelekna a thlen chhung chuan remna leh muanna a awm thei lo: Manipur CM

Manipur chief minister Yumnam Khemchand Singh chuan Pathianni khan, silai chelekna (gun culture) a thlen chhung chuan state-ah remna leh muanna tluantling a awm thei lo tih sawiin, dan loa ralthuam kawlte chu an ralthuamte tung turin a ngen. He thu hi Kangpokpi district-a Suspension of Operations (SoO) agreement-a tel pawlte tana buatsaih, Sinai Camp a tlawhnaah a sawi.

Camp hi Imphal East district-a Nongshum bula thing la tura kal mi pathum thah an nih hnu CoBRA unit, police leh security force-ten beihpui an thlakin CRPF thuneihna hnuaiah a awm tawh a ni. Beihpui thlaknaah hian mi 17 man an ni. Sinai Camp hi Kuki National Army (KNA) leh Kuki Liberation Army (KLA)-te awmna tura tih a ni.

Chief Minister hian camp leh a chhehvel a endik a, CRPF leh Assam Rifle-te chuan helai huam chhunga beihpui thlakna kalpui dan leh, dan leh thupek dinhmun an hrilh bawk. CM hian security officer-te leh hnathawkte pawh kawmin,CRPF CoBRA battalion-ah hnathawh dan a fak bawk. Pawisawi lo civil mite venhimna ṭha pek a pawimawh thu a sawi a, mipuite chu tharum thawhna lak aṭanga inthiarfihlim tur leh, dan loa ralthuam an kawlte tung turin leh, state-ah remna leh muanna siam tura thawh hona ṭha nei turin a ngen bawk.