Manipur: Central scheme leh infrastructure project thlirlet

Sorakar laipuia state minister for coal and mines, Satish Chandra Dubey chuan nimin Thawhlehni khan Manipur-a Senapati district-a central welfare scheme leh infrastructure project kalpui dan a thlirlet a, hemi hnuah state khawpui Imphal-ah chief minister Yumnam Khemchand Singh nen meeting an nei bawk.

Review meeting hi Deputy Commissioner Coference Hall-ah neih a ni a, Dubey chuan district official-te chu sector pawimawha sorkar scheme kalpui dan leh, a chhawr ṭangkaitute hnen a thlen leh thlen loh endik chhunzawm zel turin a hriattir. Minister chuan kum 2047-ah mahnia intodelh rama India siam chu an tum a nih thu a sawi. Hmarchhak biala rel inkalpawhna tihzauh leh thuam chak a nih thu sawiin, helai biala inkalpawhna kawnga harsatna awmte chu infrastructure tihhmasawnnain a sukiang dawn a ni, a ti.

Official-te chuan minister hi sector hrang hrang hmalakna leh hnathawh kalpui dan an hrilh a, chung zingah chuan district inrelbawlna, venhimna, ramngaw humhalh, healthcare, thingtlang tihhmasawn leh vantlang mipui hman ṭangkai theih thilte an tel. Dubey chuan department hotute chu central institution kaltlang mipuiin lungawi lohna an thlen theihna tur channel siam turin a ngen. Dubey hian Senapati-a District Hospital tlawhin, nfrastructure thawm ṭhatte leh, Super Speciality Ward sak mek a endik bawk.