Meghalaya: Sorkar laipuiin National Games inbuatsaihnaa puihna huang zauh

Meghalaya chief minister Conrad K Sangma chuan, state-in 39th National Games thleng tura an inbuatsaihnaah Ministry of DoNER-in puihbawmna huang a zauh avangin lawmthu a sawi. Sangma chuan Thawhṭannia X-a thuchhuah a siamah, DoNER union minister Jyotiraditya M. Scindia-a ho meeting neihah National Games chungchang sawi ho a nih thu a tarlang.

Miniter-in thlawpna nasa tak a pek avangin lawmthu a sawi a, hmarchhak biala infiamna lama talent nei ṭha tak takte leh, culture hausakna pholanna hun remchang a siamsak dawn tih Sangma chuan a sawi. Hei bakah GOC 101 Area Lt Gen Mohit Wadhwa nen inbiakna an nei bawk tih sawiin, Meghalaya tana Agniveer sipai lak, martar-te tana zangnadawmna pek, Sainik School siam leh ṭhalaite tana program hrang hrang buatsaih chungchang an sawi dun thu tih a sawi.

Chief Minister hian Iewduh market sak ṭhat mek dinhmun pawh endikin, official-te chu sumdawng, customer leh khualzinten an chhawr ṭangkai thuai theihna tura theihtawpa hma la turin a hriattir. Kawtthler cheimawi leh tui supply, inthiarna, bawlhhlawh sawngbawl leh project pawimawh eng emaw zat sawi hoin, Police Bazar-a MTC Building sak thar chungchang pawh an sawi tih a tarlang.