Tripura: CM-in Nursing college leh Training institute hawng

Tripura chief minister Manik Saha chuan, state khawpui Agartala-a Durjoynagar-ah Agartala Government Nursing College building thar, BRAM Nursing School leh ANM(R) Training Institute a hawng. Institution pathum sakna atan hian Rs vbc 8.44 sen a ni.

CM Saha chuan sorkarin medical education infrastructure thuam chak kawngah leh, state-a hriselna ṭha zawk a awm theihna tura healthcare lama mithiam tam zawk an awmna turin hma an la zel dawn tih a sawi. Damlo, state pawna inenkawl tura kal chu 80% in a tlahniam tawh tih sawiin, healthcare service thuam chak leh hmasawnna a lang zel tih a sawi. Sorkar chuan hmun hla leh tlawhpawh harsaa chengte tan medical facility changtlung siam zel a tum tih a sawi bawk.

Saha chuan facility hawn tharte hian healthcare lama tuimite tan zirna boruak ṭha zawk leh, practical training neih theihna tur hmun ṭha zawk a siamsak a beisei tih a sawi. Nursing education tihchak a, healthcare lama mithiam chher chhuah leh, state pumah medical service ṭha leh changtlung zawk pek chhuah kawngah a pui dawn tih a sawi bawk.

Chief Minister hi Bhoomi Pujan-ah pawh telin, Narsinggarh-a Rs vbc 5 senna tur primary health centre building thar lungphum a phum bawk a ni.