Meghalaya: Census 2027 thawh hnihna atan inbuatsaih ṭan

Meghalaya chu Census 2027 thawh hnihna kalpui turin a inbuatsaih ṭan a, chief secretary Shakil P Ahammed chuan hmun hla leh tlawhpawh harsaa chengte hmaih an nih lohna tura ṭan lak a pawimawh thu a sawi.

Shillong-a Principal Census Officer-te leh senior official-ten state-level training conference an neiha thu a sawiah, Ahammed chuan mipui data dik tak chu welfare scheme ruahmanna, public service kimchang taka pek chhuah leh hmasawnna kalpui tur atan a pawimawh thu a sawi. Census chu chhiarpui mai ni loin, mipui awmzat diktak hriat leh socio-economic information pawimawh tak a nih thu sawiin, hemi hmang hian sorkar chuan healthcare, zirna, mipui hamṭhatna, inkalpawhna leh digital infrastructure a tih phuisui theih thu a sawi bawk. Hmun hla leh tlawhpawh harsa, Baghmara, Dalu leh Ranikor-a chengte hmaih an nih lohna tura hma lak a pawimawh thu sawiin, sorkar aṭanga hamṭhatnate chu an hnen a thleng tur a ni, a ti.

Ahammed chuan fficial-te chu mipui vantlang zirtirna uar zawka pe tur leh, mipuiten thlawpna ṭha pe turin a ngen. Census official-te leh thawktu 10,000 vel, enumerator-te pawh telin, harsatna tam tak karah House Listing leh Housing Census phase an zawh fel theih avangin a fak bawk. An hnathawh chu ṭha taka chhunzawm a, Census thawh hnihnaah pawh chhawm nung zel turin a fuih.