Nagaland: APO-in mipat hmeichhiatna lamhawi thubuaiah rorelna dik phut

Nagaland-a Angami Public Organisation (APO) chuan, Angami biala mipat hmeichhiatna lamhawia intihduhna thlengah rorelna dik an phut. Taxi-a inpawngsualna thleng leh, hmeichhe naupang a pa in mipat hmeichhiatna lamhawia a khawih nia sawi chungchangah October 31 khan thuchhuah an siam a ni.

APO chuan thubuai pahnihte hi Chiephobozou administrative circle-ah theh luh a nih thu leh, dan kengkawhtu agency-te chu uluk taka chhui chianna nei a, rorelna dik a awm theihna tura hma la turin an ngen.

Taxi chhunga inpawngsualna thleng chu thil rapthlak tak a nih thu leh, hmeichhia leh naupangte tana public transport veivahna atana hman a him loh chungchang an sawi bawk. Taxi chu passenger-te an kal duhna hmun him taka thlentu tur an ni a, passenger-te chunga pawikhawihna thlen ṭhin chu vantlang tana mi hnawksak an nih thu an tarlang. APO chuan thuneitute leh taxi union-te chu driver-te nihna kimchang chhui chianna nei turin an phut a, passenger-te himna tur inkaihhruaina tichhuak turin an ngen bawk.

Hmeichhe naupang a pa ngeiin a pawngsual chu nunrawng thlak leh hriatthiam theih a nih loh thu APO chuan tarlang bawkin, naupangte chu hmangaihna leh ngaihsakna hnuaiah an awm tur a ni, an ti. Inpawngsualna thleng chu mihring puite chunga nunrawng taka chetna, chhungkaw pa nih tlin lo leh hmeichhiate tihchhiatna a nih thu an sawi. Angami nunphung leh Kristian-te tih atana mawi lo a nih thu an sawi bawk. Pawikhawihtute chu na taka hrem an phut a ni.