Arunachal : Congress-in Siang hydropower project tihtawp phut

Arunachal Pradesh Congress Committee chuan nimin Thawhṭanni khan, MW 11,200-MW hydropower project ruahman chu tihtawp an phut a, Siang luia tuikhuah siam duh loh lantirnaa man tawkte chhuah zalen an phut bawk. Thuchhuah an siamah, leilung fate nghawng pawi thei, an nihna, hnam ziarang leh eizawnna tichhe thei hmanga project kalpui chu tihtawp an phut a, Siang Upper Multipurpose Project (SUMP) ruahmanin a nghawng theih mipui remtihna lak hmasak a pawimawh thu an sawi.

Congress chuan pawl hrang hrangte chuan phut in ang an nei tih tarlangin, student union, ṭhalai pawl, civil society organisation leh traditional institution-te chu lungrual taka he project dodal tur hian an ngen bawk.

Hydropower project duh lohna lantira, Siang Indigenous Farmers Forum (SIFF) leh SUMP Affected Area Youth Association (SAAYA)-ten student union leh community organisation-te thlawpna darkar 36 chhung shutdown an huaihawt pawh nimin Thawhṭanni zing dar 5 aṭang khan ṭan a ni.

Shutdown hian Siang district leh Upper Siang district pum a huam a ni. An pawl chuan SUMP dodal avanga lungawi lohna lantirtute zinga man tawkte chhuah zalen an phut a ni. Congress pawhin lungawi lohna lantirtute man an ni leh, sorkar hnathawkte an hna ṭanga suspend an ni chu pawi an tih thu an sawi a, khaw hotu chunga hremna lekkawh a ni pawh na taka an dem thu an tarlang. Man tawkte a rang lama chhuah zalen an phut a, Arunachal Pradesh Unlawful Activities (Prevention) Act hnuaia thubuai ziah luh pawh hnuhkir an phut a ni. Party chuan project thawhna tur hmun aṭanga security force-te chhuah tir an phut bawk a, lungawi lohna lantirtute zinga hliam tuarte enkawl zuina pek an phut bawk.