Assam: Ram acre 215 aṭangin chhungkaw 550 vel sawn chhuak dawn

Assam sorkar chuan Dhubri district-a sorkar ram, ram acre 215 vela zaua dan loa awm sawn chhuah tumin beihpui thlakna a kalpui dawn tih official-ten an sawi. Official-te chuan chhungkaw 550 vel sawn chhuah an nih tur thu an sawi a, beihpui thlakna hi Pathianni zing aṭang khan Gauripur biala Alamganj Part-9 ah kalpui ṭan a ni.

Dhubri district commissioner Dibakar Nath chuan hriattirna chu chhungkaw 700 vel hnenah tihchhuah a ni tawh tih sawiin, chhungkaw 150 chuan chhawmdawlna dil turin court an pan tih a tarlang. Chhungkaw eng maw zat chu hriattirna an dawn hnuah anmahni duhthua an insawn chhuah tawh thu a sawi bawk.

District thuneitute chuan beihpui thlakna tur hian excavator 50, tractor-trolley leh khawl dangte an tir a, civil administration leh police-ten venhimna an kalpui bawk. Kum 2021-a chief minister atana Himanta Biswa Sarma thlan a nih aṭangin, dan loa sorkar rama cheng sawn chhuah beihpui vawi tam tak thlak a lo ni tawh a ni. Sawn chhuah zingah Bengali ṭawng hmang Muslim, 'Miya' tiha hriat an tam ber a, Miya hi Bangladesh aṭanga India ramchhunga dan loa pem lutte an ni tlangpui a ni.