Manipur: CM hluiin dan loa pem lutte data puangzar turin sorkar ngen

Manipur chief minister hlui N Biren Singh chuan nimin Thawhlehni khan, state home department chu mipuiin an rinna tihchakna tur leh, sorkarin mipui humhim tura a inpekna nemnghehna turin an state-a dan loa pem lutte biometric enrollment status kimchang puangzar ṭhin turin a ngen.

X-a thuchhuah a siamah, Singh chuan a thil phut chungchang chu politics lam a nih loh thu leh, ran leh hnam humhimna leh ramria venhimna kenkawh bakah, hun lo awm zel tura an state tana thil pawimawh a ni tih a tarlang.

CM hlui chuan he thu hi Mizoram sorkarin Myanmar aṭanga raltlan, state chhunga inhumhimna zawnga awm mekte biometric enrollment peihfel a ni dawn tawh tih a puan hnuah a sawi a ni. Mizoram sorkarin dan loa pem lutte uluk takin a enfiah a, hei hian state hamṭhatna humhim tura hma lakna pawimawhzia a lantir a ni, a ti. Chief Minister hlui chuan Manipur Home Department pawhin biometric data an lakkhawm puangzar turin a ngen zui nghal a ni.

Langtlang taka puanzarna neih chuan mipuiin an rinna a tichak dawn tih a sawi a, state himna leh leilung fate tana hamṭhatna atan a pawimawh tih a sawi. Manipur home minister Konthoujam Govindas chuan August thla khan, Myanmar aṭanga raltlan mi 24,475 state-ah an awm tih Assembly-ah a sawi.