Meghalaya: Sikul 700 chuang hnenah puihbawmna pe dawn

Meghalaya chief minister Conrad Sangma chuan, state sorkarin ṭanpuina dawng lo sikul 700 chuang hnenah sum lama puihbawmna pekna tur ruahmanna a siam mek tih a puang. He thu hi Shillong-a Presbyterian Higher Secondary School kum 126 tlin lawmnaah a sawi a, sikul ṭanpuina dawngte leh dawng lote puihbawmdan tur ruahman mek a ni, a ti.

Chief Minister chuan higher secondary section thar a hawn bakah, sikul auditorium sakna tur lungphum a phum bawk. Sangma chuan tun dinhmunah sikul 700 vel sorkar puihbawmna dawng lo an awm tih sawiin, mitinin sorkar puihna an dawn theihna tura hma lak a ni, a ti. Sorkarin kumtin zirna atan Rs vbc 4,000 a ruahman tih a sawi bawk.

Meghalaya-ah hian lower primary sikul 9,000 vel a awm a, higher secondary sikul 500 vel chauh a awm thung. Hei vang hian zirlai pawl 10 pass-te tan sikul luhna turah harsatna a thlen phah fo a ni. College 100 chuang awm tawh mah se, higher education-ah hunrei tak chhung harsatna an tawk tawh a ni.

Chief Minister chuan secondary education tihhmasawn kawnga 'CM IMPACT' hmalakna chu fakin, Secondary School Leaving Certificate (SSLC) pass percentage chu kum nga kalta chhungin 50% aṭangin 90% chuangah a kai chho tih a sawi.