Tripura University-in harsatna tawk

Tripura university chuan har­satna a tawk mek a, post pawimawh vice-chancellor (VC) leh registrat-te chu  hnawhkhah loin a awm mek tih official-ten an sawi. 

Union ministry of human resource development chuan Tri­pura University (Central) Vice-Chancellor Professor Vijaykumar Laxmikantrao Dharurkar chu eirua puh nih chungchangah a ban a, senior most professor, Botany Department hotu Sangram Sinha chu September thla tir lam khan acting VC atan a ruat a ni.Sinha hian kar liam ta khan thuneituten hnenah lehkha thawnin, a hriselna ṭhat tawk loh vangin vo­luntary retirement a dil tih a sawi. Sinha hian nakkum December thlaa pension-a chhuak tawh tur a ni. 

University official chuan Chancellor post hi kum sarih zet hnawhkhah loh a ni tawh a, Registrar post pawh kum ruk a ruak tawh tih a sawi. College Development Council Director post chu kum hnih leh, Controller of Examinations post pawh thla ruk hnawh khah lohin an awm. Finance Officer Uttam Kumar Das pawh thla hnih hnuah pension-in a chhuak dawn bawk. 

Post pawimawhte hnawhkhah loha dah reng an nih vangin official junior zawkten  Registrar, Controller of Examinations leh Director of College Development Council hna hi an khawih a, mahse thutlukna pawimawh erawh an siam theih loh avangin hei hian university enkawlna kawngah pawh nghawng a nei a ni. 

Tripura University hi kum 1987-a Tripura sorkarin a din a ni a, kum 2007 khan central uni­versity-ah hlankai a ni. India Pre­sident chu Visitor niin, Tripura Governor chu Chief Rector a ni.