Assam-a APHLC pawl pahnihah phel

Assam-a poli­tical party thar, All Party Hill Lea­ders Conference (APHLC) chu party chhungah buaina a awm avangin an phel a, president J.I.Kathar leh general secretary Jona Te­rang kaihhruai pawl pahnihah an inṭhen. 

Karbi Anglong-a press conference a neihah, general secretary Jona Terang chuan Parliament inthlan neih zawh tak aṭang khan party member ṭhenkhat chu president J.I.Kathar thil kalpui danah an lungawi lo tih a sawi. Executive meeting neihah pawh member-te thurawn lak a ni ngai lo a, party president hian a duh anga thil a kalpui ṭhin avangin an lawm lo hle tih a sawi a, hei hi party kalphung tur a ni lo, a ti. 

Public meeting neih apiangah J.I.Kathar chuan Karbi Anglong hruaitute chu a sawisel reng bawk a, an thiltih a dik lo niin a sel fo a ni, tiin a sawi. Kathar chu ama mimal hlawkna tur atana chauha thil ti ṭhinah puhin, hei vang hian an thawhpui chhunzawm zel thei lo tih a sawi. Terang kaihhruai lam pawlah hian Hemari Rongpi chu president atan ruat a nih thu a sawi nghal bawk.