Delhi-a NE festival buatsaih a hlawhtling
Delhi-a Indira Gandhi National Centre For The Arts (IGNCA)-a ni thum awh, North East Festival vawi 7-na buatsaih chu Pathianni khan zawhfel a ni ta a, festival hi a hlawhtling hle.
Festival-ah hian hmarchhak state hrang hrang- Assam, Arunachal Pradesh, Mizoram, Nagaland, Manipur, Tripura, Meghalaya leh Sikkim ten an ei tur chi hrang hrangte phochhuahna, food stall 40 an siam. Heng foodstall-te hi an lun hle a, dawr ṭhenkhat chuan ei tur hi cheng nuai li man vel an hralh chhuak hman a ni.
Festival hmanpuitu, union minister for youth and sports Kiren Rijiju chuan festival chhima kalte hnenah chuan hmarchhak bial an la hmu lo anih chuan India ram an la hmu lo tihna a ni ang, tia a lo hrilh thu a sawi. Development of North Eastern Region (DoNER) minister Dr Jitendra Singh pawhin ni thum awh festival an buatsaih chuan an beisei bakin ngaihven leh ngaihhlut a hlawh tih a sawi a, festival chhimtu tam tak chu Delhi khawpuia cheng leh hmarchhak mi ni lo, ramchhung hmun danga mite an ni tih a sawi bawk.
Food Processing Industries minister Rameshwar Teli chuan, "Hmun dang aṭanga rawn kalte hnenah chuan prime minister Narendra Modi thusawi ka lo hrilh chhawng a, in chaua in hah tawh a nih chuan hmarchhak bial tlawh ula, in rilru tihtharin a awm mai ang ka lo ti a ni. Hmarchhak biala in lo kal chuan,he khawvelah vanram a lo awm ta ang maiin in hre hial ang," a ti.