Meghalaya: GTCC-in National Games inbuatsaihna endik

Meghalaya-a Shillong, Jowai leh Tura-a nakkum March thlaa 39th National Games an thlen turah inbuatsaihna ngawrh takin kalpui mek a ni. National Games-ah hian a inelna 39 a awm dawn a, inbuatsaihna peng pakhat atan Indian Olympic Association (IOA) chuan October 14 khan Games Technical Conduct Committee (GTCC) chu Sunaina Kumari kaihhruaina hnuaiah a din a ni.

Committee-a member pangate chuan November 2-5 chhung khan Meghalaya tlawhin, inelna neihna hmun tur an tlawh bakah, inbuatsaihna kalpuidan an endik bawk. Ningania press conference-a thu a sawiah, GTCC chairperson Sunaina Kumari chuan Ningani khan inbuatsaihna kalpui dan chu ṭha a tih thu leh, Shillong leh Jowai-a inelna neihna hmun tur infrastructure pawh duhthusam a nih thu a sawi a, state hmalakna a fak bawk. Sorkar department, sports official leh stakeholder-te thawh hona ṭhat thu pawh a sawilang bawk.

Kumari chuan state chief minister Conrad K Sangma, Deputy Chief Minister pahnihte leh sports minister Dr Vijay Kumar bakah sorkar official-ten thlawpna an pek ṭhat avangin lawmthu a sawi. Inbuatsaihna kalpui a nih chhungin technical lama inkaihhruaina leh puihna pek zel a ni dawn tih a tarlang.