Sikkim: Defence Minister-in sipai inralrin dan endik

Defence minister Rajnath Singh chuan Inrinni khan Sikkim-a Line of Actual Control (LAC)-a sipaite inralrindan leh inbuatsaihna a endik a, ramri infrastructure tihchangtlunna leh, indona lama hnehna chang tura sipaite hmanrua changkang leh technology ṭha ber bera thuam a pawimawh thu a sawi.

Minister hi Siliguri bul Sukna-headquartered 33 Corps-ah a thleng a ni. Sukna leh a chhehvel hi hmun pawimawh tak a ni a; supply, ralthuam, ei leh in, damdawi leh sipaite awmna hmun ber a ni. Helai hi venhim ngai zual lai a nih avangin darkar tin sipaite chu an inralrin a ṭul tih Singh chuan a sawi. Singh hi army chief general Dhiraj Seth, Eastern army commander lieutenant general VMB Krishnan leh corps commander lieutenant general Man Raj Singh Mann-ten an ṭawiawm.

Defence Minister hian Diwali-ah Sikkim-a Sherathang war memorial tlawh a tum bawk a, helai hi kum 1967-a Nathu La leh Cho La-a China nena inbeihna thlenga India sipai thite hriatrengna hmun a ni. He inbeihnaah hian India chuan hnehna a chang a, sipai 88 an thih bakah 163-in hliam an tuar a; China sipai 340 an thih bakah 450-in hliam an tuar ve bawk.

Minister Singh hian Siliguri bula Bagdogra-ah sipaite chu cyber hmanga do letna tichak turin a fuih a, inbiakpawhna leh inzirtirna thuam chak turin a ngen bawk. Bagdogra-a Air Force Station-a air warrior-te nen inbiakna neiin ramria cyber hmanga inbeihna thleng ṭhin chak zawka do let turin a fuih. He hunah hian IAF hotu air chief marshal, Ashutosh Dixit pawh a tel a ni.