Arunachal: SUMP dodalna lantirtu man tawk mi 4 chhuah zalen

Arunachal Pradesh-a MW- 11,200 Siang Upper Multipurpose Project kalpui tura ruahman dodalnaa lungawi lohna lantirtu, October 9-a man tawk zinga mi pali chu Itanagar bul Jully Central Jail aṭangin Inrinni khan chhuah zalen an ni. Heng mi palite hi Arunachal Pradesh Unlawful Activities (Prevention) Act, 2014 hnuaiah man an ni.

State sorkar hnena mega dam ruahman dodal kawnga hmahruaitu, Siang Indigenous Farmers’ Forum (SIFF) ten chhuah zalen an phut thu an thlen hnuah heng mi palite hi chhuah an ni. Hetih lai hian nawrh huaihawt zinga tam tak chu lung inah hian an la tang chhunzawm a, Siang Valley-ah pawh venhimna hna thawk turin sipai ṭhahnem tak an la awm bawk.

November 6 khan Chief Minister's Office (CMO) chuan, khawtlang hruaitu gaonburas leh gaonburis-te SUMP chungchanga lungawi lohna an lantir avanga hremna pek tura tihte pawh hnuhdawh a ni tih a tarlang. Sorkar chuan lungawi lohna lantirtute laka FIR theh luh hnuhdawhna tur erawh dan anga kalpui a ṭul thu an tarlang.

Sorkar chuan Central Armed Police Force (CAPF) leh, Rapid Action Force (RAF) te chhuah tir chungchang chu SIFF aiawhte nen an la sawi ho leh dawn tih an sawi bawk. SIFF chu inbiakna neihpui chhunzawm zel tura ngenin, pawl aiawh ruata chief minister Pema Khandu nen meeting neih tur hun ruahman turin an hriattir.