Meghalaya: CM-in infrastructure project 3 hawng

Meghalaya chief minister Conrad K Sangma chuan nimin November 9 khan, South Garo Hills district-ah infrastructure project pawimawh tak tak pathum a hawng. Project hawnte hi PRIME Hub, farmer's market leh block integrated development complex-te an ni a, hengte hi thingtlang eizawnna tihphuisuina tura tih niin, thlai thar chhuah hralhna tur leh inrelbawlna ṭha zawk mipuite hnena chhawp chhuahna tur a ni bawk.

Chokpot Warima PRIME Hub hi mau leh kuhva rah sawngbawlna tura ruahman a ni a, mau leh kuhva rah dahkhawmna, siamna hmun, training leh hralh chhuah kawngah a pui dawn a ni. Tun dinhmunah South Garo Hills chuan PRIME Hubs pali a nei tawh a, Rongara, Baghmara leh Gasuapara-ahte din a lo ni tawh bawk. District hian investment Rs vbc 4.24 hmangin micro-processing unit 32 a nei tawh bawk. He hmalakna hi loneitu leh tualchhung entrepreneur-ten thingtlang huam chhunga an thil siam chhuah hralhna tur thuam chakna a ni bawk a ni.

CM Sangma chuan South Garo Hills-a District Rural Development Agency (DRDA) kaltanga Rs vbc 9.26 senga sak, Chokpot Farmers’ Market a hawng bawk. He market-ah hian loneitu 3,000 chuangin an thei leh thlai thar chhuahte an hralh chhuak thei dawn a, hei hian Farmer Producer Organisations (FPOs), Farmer Producer Companies (FPCs) leh sorkar agricultural scheme-te nen an inthlunzawmna a tichak dawn bawk a ni.

Chokpot Community and Rural Development (C&RD) Block-a Block Integrated Development Complex hawng bawkin, Sangma chuan infrastructure pawimawhnate a sawi nghal bawk. Meghalaya pumah infrastructure thuam chak turin kum riat liam ta aṭanga hma lak a ni tawh a ni, a ti. Block Development Officer (BDO) leh staff member-te chu mipui tana an rawngbawlna ṭha taka hlen chhuak turin a fuih bawk.