Assam: Cabinet-in Defence Park dinna tur pawm

Assam sorkar chuan Morigaon district-a Nelli-ah ram bigha 6,000 vela zauah state-of-the-art Defence Park a din dawn. Park dinna tur hi November 3-a state cabinet meeting-ah pawm a ni a, project kalpui tur hian Industries department hnenah ram pek a ni ang.

Assam hian sector hrang hrang; semiconductor leh high-value industry-ah te hmasawnna tam tak nei mah se, defence lamah ram pek mumal a awm loh avangin investment pawh a khawtlai phah a ni. Defence Park din tura ruahmanna hian hun rei tak chhunga harsatna awmte a sutkian theih beisei a ni a, Assam-a industry tihhmasawnnaah kawng a hawng thei dawn a, he hmalakna hi Atmanirbhar Bharat hmathlir nena inzulzui a nih thu sorkar thuchhuah chuan a tarlang. Ramchhung leh pawna investor lian tak takte hip a nih theihnan state sorkar chuan roadshow a buatsaih thuai dawn a, Assam-in industry-a theihna a neihte leh, investment lama hmasawnna pholanna tur hmalakna hrang hrang a kalpui dawn bawk a ni.

Sorkar chuan Assam Aerospace and Defence Manufacturing Policy chu nikum February 23 khan tichhuakin, he policy hian Assam chu khawvel puma aerospace leh defence manufacturing hmunpuia din a tum thu a tarlang. He hmalakna hian sector hrang hrang a huam dawn a, chung zingah chuan aircraft siam chhuah, defence hmanrua changkang, ralthuam hrang hrang, aerial vehicle leh drone, avionic leh simulation system, enkawl chhunzawmna leh siamṭhat bakah service-te pawh a tel dawn. Defence kaihhnawih zirchianna leh hmasawnna bakah defence start-up leh micro, small leh medium enterprise a huam bawk ang.