Arunachal: Geothermal-a thuam drying facility hawng

Arunachal Pradesh Science and Technology minister, Dasanglu Pul chuan November 10, Thawhlehni khan West Kameng district-a Dirang-ah geothermal-a thuam drying facility a hawng a, hemi hmang hian thlai thar chhuah hloh zat tihtlem, loneitute sum lakluh tihpun, renewable energy hmanga lo neih tihhmasawn tum a ni.

He facility hi Union Ministry of Earth Sciences fund bakah, state sorkar puihnaa din a ni a, tualchhunga lo neih leh ranvulh aṭanga thil siam chhuah, kiwi, apple, persimmon leh yak sate vawn ṭhatna tura ruahman a ni. Hawnna inkhawmah hian India-a Norway ambassador May-Elin Sterner, Dirang MLA Phurpa Tsering, scientist-te leh India, Norway leh Iceland-a mithiamte bakah institution hrang hranga mithiamte an tel. Minister Pul chuan facility-a technology an hman chuan tualchhung aṭanga thil thar chhuahte hralh kawngah a pui dawn a, eizawnna mumal a siamsak dawn tih a sawi.

Minister chuan Union Ministry of earth Sciences chu state-a Seismic Microzonation Project thawh tur pawm tawhah sanction order tichhuak turin a ngen nghal a ni. Project ruahman hian khuarel chhiatna thleng thei hmun derthawng a hrechhuak thei dawn a, infrastructure ruahmanna leh hmasawnna atan a pawimawh tih a tarlang.