Nagaland: Oxford Museum-in Naga mi ruhro 39 thawn let

Oxford University-a Pitt Rivers Museum chuan, India-ah Naga mi ruhro 39 a thawn let. Nagaland palai member 30 chu heng ruhrote hi Thawhṭanni khan Oxford-ah hlan an ni a, Nagaland-a memorial park-ah phum an ni dawn.

Pitt Rivers Museum director, professor Laura Van Broekhoven chuan heng Naga mi ruhro 39 an rama thawn let a nih theihna tura an thawhpuite nen thawh hona ṭha an nei chu lawmawm a tih thu a sawi. Museum-ah hian Naga material ṭhahnem tak dahkhawm a ni a, a tam zawk chu kum zabi 20 hunlai ami te an ni. Britain-in India an awp laia Naga mi an hruai thlak zinga ruhrote pawh an tel a ni.

Naga Reconciliation Forum chuan kumin kumtir lam khan heng ruhrote hi India-a thawn let a nih theihna turin museum hi an lo be tawh a, inbiaknaah hian FNR leh RRaD (Recover, Restore and Decolonise) team-te an tel.

Kum 2020 khan museum hian Nagaland-a community hrang hrang leh FNR leh RRaD team, tribal Hohos, kum upate leh kohhrante a lo thawhpui ṭan tawh a ni. Kumin February thla khan, Oxford university hnenah FNR chuan Pitt Rivers Museum-ah Naga mi ruhro 40 dahṭhat a ni tih a hriattir a, July 13 khan Oxford University Council chuan heng ruhrote hi India-a thawn let a remti a ni. Council chuan ruhro 39 thawn let chu pawmin, pakhat erawh Naga hnam a nih leh loh hriatchian a nih loh vangin an remti lo thung.