Meghalaya: KJDSTA-in lungawi lohna lantir

Meghalaya-a Khasi Jaintia Deficit School Teachers Association (KJDSTA) an thil phut chungchangah Meghalaya Education Department-in chhanna an pe lo tih sawiin, Nilaini aṭang khan tiam chin awm loin lungawi lohna an lantir.

KJDSTA president Boswell Pala chuan, an pawl hian Thawhlehni zan khan WhatsApp-ah department aṭanga lehkhathawn an dawn thu sawiin, an thil phut chhanna ni loin October 8-a lehkhathawn an dawn tawh, siam danglam mai chauh a nih thu a sawi.

An pawl hian sorkarin Centralized Provident Fund (CPF) ruahmanna siam danglam tura a rawtna chu an dodal a, hei hian sorkar leh zirtirtuten kum 2023-a scheme an pawm a tichhe dawn niin an sawi. Pala chuan CPF scheme hi 1969 Act-a thupek anga kalpui a nih thu leh, sorkarin court hmaa a thehluh hnua siam a nih thu a sawi.KJDSTA hotu chuan Board of Trustees chungchanga sorkar ruahmanna a dodal bawk a, department chuan Board bylaws, kum thum chhung hna thawh theihna tur a siam chu a ngaihthah niin a sawi. Pala chuan thil phut belh an neih loh thu leh, thil diktak chauh an phut thu a tarlang.

Lungawi lohna lantir chhung hian School Managing Committee-te chu sikul endik tura tih luih an nih thu leh, committee chuan zirtirtute an hriatthiam a beisei thu a sawi. Lungawi lohna lantir hian Khasi leh Jaintia Hills-a deficit school eng emaw zat a nghawng dawn niin an sawi a ni.