Sorkarin SUMP kalpui turah mipui a nawr lui tur a ni lo: AGWS President

Arunachal Pradesh-a Adi Galo Welfare Society (AGWS) president Geyi Bagra chuan Ningani khan, sorkarin gigawatt (GW) 11.2 Siang Upper Multipurpose Project (SUMP) a ruahmanah mipui a nawr lui tur a ni lo tih sawiin, Arunachal Pradesh leh Assam mipuite ngaihdan an zah tur a ni, a ti.

SUMP dodalna atana Arunachal Pradesh-a Upper Siang district-a Geku aṭanga Itanagar, km 400-a thui kawngzawh kaihruaitu Bagra hian sorkar chu harsatna tawk khawtlang mipui nen inbiakna nei turin a ngen a, project-in chenna leilung leh, khawtlang nuna nghawng a neih dan tur chungchangah an ngaihdante ngaihthlak sak turin a ngen. Kawngzawh hi November 4 aṭang khan neih ṭan a ni a, Ningani tlai lam khan North Lakhimpur an thleng tawh a, Bagra hi mi 14-in an ṭawiawm a ni.

Bagra chuan sorkar chu tualchhung mite nen inrawnkhawmna mumal awm loin project ruahman kalpui tumah a puh. SUMP dodaltu man an nih bakah, project-in a nghawngna hmuna security force dah an nih avangin a lungawi loh thu a sawi bawk. Sorkarin mipui nen inremna an neih theihna tura inbiakna neih a ṭul thu sawiin, project dodaltu man tawkte chhuah zalen bakah, khawtlang hruaitu Gaon Burah leh sorkar hnathawkte hremna pek hnuhkir a phut a, security force-te chhuahtir turin a ti bawk. Bagra chuan sorkarin mipui lakah tharum thawhna a hmang tur a ni lo tih sawiin, mipuite ngaihdan a zah tur a ni, a ti bawk.