Nagaland: Naga mi ruhro lak lette Solidarity park-ah pholang dawn

Naga mi ruhro set 39 chuang, United Kingdom-a Oxford University-a Pitt Rivers Museum-a dah lak lette chu Nagaland-a Solidarity Park-ah ni hnih aṭanga ni thum chhung mipui en theiha pholan a ni dawn tih Forum for Naga Reconciliation (FNR) member Dr Visier Sanyü chuan a sawi. Sanyü chuan Naga mite ruhro lak letna pualin programme pahnih buatsaih a ni dawn tih sawiin, homecoming ceremony neih hnuah ruhrote hi phum an ni ang.

Dimapur-a thu a sawiah Sanyü chuan, Naga Students’ Federation (NSF) leh Naga People’s Movement for Human Rights-ten ruhro phumna tur hmun ram an pek avangin lawmthu a sawi. Ruhrote chu mipui hmuh theihin leh phum an nih hmaa zahna an lantir theihna turin Solidarity Park-ah ni hnih aṭanga ni thum chhung dah a ni dawn ni, a ti.

Recover, Restore and Decolonise (RRaD) coordinator, Dr Ellen Konyak Jamir chuan Naga mite ruhro lak letna chu dikna chanvo humhimna a nih thu a sawi. Kum 100 chuang ramdang kuta an awm hnuah state-ah lak let an ni tih a sawi bawk. Pitt Rivers Museum chuan Naga mi ruhro set 39 chuang chu Nagaland kutah a hlan tawh a, heng ruhrote hi Britain-in India an awp laia Naga mi an hruai thlak zinga mite an ni. Oxford museum-ah kum tam tak dah an lo ni tawh a ni. Pitt Rivers Museum hian Naga hnam nena inkaihnawihna neih thil 6,000 chuang an nei a, heng zingah hian a tam ber hi Britain-in India a awp laia an lak a ni. Kum 1919 leh 1940 inkar khang heng thilte musuem kutah hian hlan an ni