
Tripura: January-ah Census 2027 thawh hnihna kalpui dawn
Tripura-ah Census 2027 thawh hnihna chu nakkum January 25 aṭanga February 28 thleng neih a ni dawn a; mipui awm zat, khawtlang leh sum leh pai dinhmun chipchiar taka lakkhawmna tur a ni tih official chuan November 14 khan a sawi. Tripura Census operations director, Ratan Biswas chuan he Census 2027 thawh hnihna neih a nih hmain, January 10 aṭanga January 24 thleng self-enumeration tih theih a nih tur thu a sawi.
Census 2027 thawh khatna chu kumin August thla khan neih a ni a, chenna in dinhmun leh bungruate lakkhawm a ni. Biswas chuan thawh hnihnaah mipui awm zat, socio-economic, cultural, migration leh fertility kaihhnawih a huam dawn tih a sawi. Census 2027-ah hian zawhna 40 awmna questionnaire hman a ni dawn a, hei hian chenna nei lote pawh a huam tel dawn a ni. Census 2027 chu ramchhunga digital census kalpui hmasakna ber tur niin, mobile application leh web hmanga thuam technology-in data lakkhawm leh enfiah hna kalpui a ni ang.
Census kalpuina tura hmalakna peng pakhatah, senior official leh district-level administrative officer-te inbuatsaihna atan Zirtawpni khan Agartala-a Pragya Bhavan-ah workshop buatsaih a ni. Official-te chanvo leh mawhphurhna, inter-departmental thawh hona leh chhiarpui neihna atana inrelbawlna leh sum mamawh tur chungchangte sawi ho a ni. Biswas chuan district-level-a thawktute tan training session neih mek a nih thu sawiin, master trainer leh field personnel-te puihnain mumal taka kalpui a nih theihnan hma lak mek a nih thu a sawi.