Tripura: Hmeichhe entrepreneur-ten an thil siamte IITF-ah pho chhuak

Tripura-a hmeichhe entrepreneur-te chuan New Delhi-a Pragati Maidan-a 45th India International Trade Fair (IITF) ah an thil siamte an pho chhuak. He hunah hian state-a Women Self-Help Group (SHG) member-te an tel a, IITF hmang an thil siamte market zau zawka an hralh chhuah theih phah a ni.

Official-te chuan he fair-a an telna hian tualchhung lamah pawh nghawng ṭha tak neiin, thil siam hralh chhuah theihna a tipung dawn a, hemi rualin thingtlang hmeichhe entrepreneur-te tan sumdawnna thuam chak leh, an sum lakluh tihpunna hun remchang a siamsak dawn niin an sawi.

Industries and Commerce minister, Santana Chakma pawhin Tripura-a SHG-te kutchhuakna pho chhuahna stall-te a lo tlawh tawh a ni. He hunah hian member telte nen inbiakna an nei a; an thawhrimna, thiam thil leh entrepreneurship tihhmasawnna tura an an hmalaknate a fak a ni. International trade fair-a Tripura-a hmeichhiate kaihhruai SHG an tel hian, state chhunga hmeichhiate kutkawih eizawnna (entrepreneurship), mahnia intundinna leh economy tihhmasawn an ngaih pawimawhzia a pholang tih official chuan a sawi bawk.