Tripura Congress hotu beih vangin lungawi lohna lantir

19th January, 2021

Tripura Pradesh Congress chuan BJP thlawp misualten state Congress president Pijush Kanti Biswan an beih avanga lungawi lohna lantirin, nimin khan state pumah darkar 12 chhung lungawi lohna an lantir.

Congress hotu leh a ṭhuihruaite chu Sepahijala district-a meeting nei turin an kal a, mahse Inrinni zan tlai tawh takah khan BJP worker leh an thurualpui te chu misual ṭhenkhatin lo beiin, mi pasarihin hliam an tuar. Biswas chuan a car pawh an tihchhiatsak tih a sawi bawk. Pawikhawihna thlen lai hian police-te pawh an awm niin an sawi bawk.

Beih an tawh hnu hian Congress president hi Bishalgarh sub-division hospital-ah hruai a ni a, mahse chhuah tir leh nghal a ni. Hetih lai hian Sepahijala district official-te chuan dan leh thupek dinhmun avangin Congress hruaitu hi a zin tum hi ṭhulh turin ṭum eng emaw zat an hrilh a, mahse police-te thusawi chu a ngaithla duh lo niin an sawi.

Congress hruaitu hian beih a tawh avangin police-ah complaint a thehlut nghal a, FIR ziah luh niin misualte hi chhui chian mek an nih thu police official chuan a sawi.

CPI(M) MP chenna in bei

Sepahijala distrcit-a state Congress president Pijush Kanti Biswas beih a nih hnu lawkah, Matripallai area-ah Tripura CPI(M) MP Jharna Das Baidhya chenna in chu beih a ni ve leh bawk. Baidya chuan Pathiannia Democratic Youth Federation of India (DYFI) leh Students' Federation of India (SFI)-ten rally an buatsaih hnuah, bike-a chuang mi 30-40 vel chu a inah hian kalin an rawn bei tih a sawi. Rally-ah hian Baidya pawh hi a tel ve a ni.

CPI(M) MP chuan BJP thlawp, misual rualte chuan amah pawh beih an tum nia sawiin, a security guard-te chuan an lo dang thei niin a sawi a, a guard zingah pawh hliam tuar an awm tih a sawi bawk. Rally hi buaina chhuak vangin an titawp a,in lamah haw nghalin a hnu lawkah bike-a chuangte hi a in hi rawn panin an rawn bei ta mai niin a sawi.

Pathianni vek han CPI(M) Duki subdivision office chu beih a ni bawk a, CPI(M) worker pahnihte kut an thlak a, bike leh car pakhat an tihchhiat sak bawk.