Manipur: NDPS Act hnuaiah thubuai 317 ziak lut tawh

Manipur-a dan kengkawhtute chuan kumin October thla thleng khan NDPS Act hnuaiah thubuai 317 an ziak lut tawh a, mi 441 man an ni tawh bawk. Nikum khan NDPS hnuaiah thubuai 284 ziah luh niin, mi 349 man an ni.

NCB, Imphal Zonal Unit superintendent Aram Anth chuan NDPS hnuaia thubuai hrang hranga man mi 269 chu lung-inah an tang mek a, mi 166 bail an awm tih a sawi. State chhunga ruihhlo tawlhruk, a bikin ramri kaltlanga ruihhlo tawlhrukna chungchangah dan kengkawhtuten harsatna an tawk tih a sawi bawk. He thu hi Imphal-a Thoubal district Regional Office-a Press Information Bureau (PIB) buatsaih media workshop-ah a tarlang.

Manipur chuan Myanmar nen international ramri an inṭawm a, helai hmunah hian ruihhlo tawlhrukna a hluar hle a ni, a ti. Ramri thui tak leh a leilung chhengchhe tak chuan dan kengkawhte hmalaknaah harsatna a thlen tih sawiin, khawtlang mipui thawhpuina leh agency hrang hrang thawh hona neih a pawimawh thu a tarlang.

State-a tlangram huam chhunga opium chin hluar tak chuan sorkar laipuiin ram pum huap campaign a kalpui, Nasha Mukt Bharat Abhiyan (NMBA)-ah harsatna a thlen tih a sawi. Dan loa opium chinin boruak a nghawng dan sawiin, boruak chhiatna, leilung chhiatna, leimin, thing leh mau tihrem, pawikhawihna pung leh economy-te a nghawng tih a sawi.

Kum 2020 August 15 aṭanga kalpui, NMBA hi ram pum huap ruihhlo hmansual do kawnga hmalakna a ni. Campaign thil tum ber chu Viksit Bharat 2047 hmathlir anga ruihhlo awm lohna rama siam a ni.