
Meghalaya: Grassroots music project hmangin artist 8,000 puihbawmna pe
Meghalaya sorkarin Grassroots Music Project a kalpui hnuaiah, artist 8,000 vel puihbawmna pek an ni tawh a, musician-te tana hmalakna lian berte zinga mi a ni tih chief minister Conrad K Sangma chuan Ningani khan a sawi. MGMP project hi kum 2022 khan din a ni a; tualchhung musician, band leh lamthiamte tan platform pawimawh tak niin, eizawnna kawng a hawnsak a ni.
Chief Minister chuan Shillong chu Music Capital ni thei tura theihna a neih thu sawiin, he thil tihlawhtling tur hian mi hla hmanga performance neih tihtawp a, original music chawisangtu ecosystem siam a ngai a ni, a ti. India International Music Week (IIMW)-a musician, artist ṭhalaite leh music industry professional-te hmaa thu a sawiah, Sangma chuan project chu tualchhunga talent nei ṭhaten an thiamna an pholan theihna tur platform siamsakna a nih thu a sawi.
MGMP hnuaiah hian artist 8,000 an awm mek a, musician community lian ber a ni tih Sangma chuan a sawi. Sorkar, musician-te leh community-in thawh hona ṭha an neih chhoh zel avangin lawmthu a sawi bawk. Naupang leh ṭhalaite chuan an tuina leh nuam tih zawng an phochhuah theihna tur platform siamsak an phu tih a sawi a, ṭhalaite chu rimawi, infiamna, kukawih eizawnna (entrepreneurship), tourism, hnathawh tur siam leh thiamna tihhmasawn a pawimawh thu a sawi bawk.
CM Sangma chuan music ecosystem huang zauh tura sorkar inpekna sawilangin, infrastructure zingah studio leh music school-te thuam chak a ni dawn tih a sawi. Ṭhalaite chu talent leh tumruhna nasa an neih thu leh, platform leh kaihhruaina ṭha an mamawh thu a sawi. International music industry-a mi thiamte chu tualchhung artist-te kaihhruaina pe turin a ngen bawk a ni.