Manipur: Security force-ten KCP cadre kaphlum

Manipur-a Imphal West district-ah nimin Zirtawpni zing khan, dan pawna hnawl helpawl Kangleipak Communist Party (KCP) cadre pakhat chu security force-te nen an inbeihnaah kahhlum a ni a, helpawl member dang eng emaw zat man an ni tih official-ten an sawi. Silaia inkahna hi security force-ten Patsoi Police Station hnuai, Yurembam huam chhunga beihpui an thlaknaa thleng a ni.

Security force-ten beihpui an thlak laiin helpawlte chuan silaiin an lo kap a, security-ten chhang let ve nghalin helpawl zinga mi pakhat kahhlum a ni. Helpawl member nia rinhlelh eng emaw zat man an ni bawk tih official-te chuan an sawi. Kum 2023 May thlaa Meitei leh Kuki community-te inkara buaina a chhuah hnuah, security force-te hian state-a hmun derthawng zualah buaina tihtawp tumin beihpui an thlak chhunzawm zel.

State-a hnam leh hnam inkara buaina a chhuah hnuah mi 306-in nunna an chan tawh a, mi 49 chin hriat lohin an awm bawk. Mi sangtelin an chenna in leh lo an chhuahsan tawh bawk. Hei bakah kumin February thla aṭanga Kuki leh, Naga community inkara buaina chhuakah mi 50 in nunna an chan tawh bawk a ni.