Assam : Prime Minister-in ram chhunga lei sei ber a hawng
Prime Minister Narendra Modi chuan ramchhunga lei sei ber leh rel kawng ni bawk, Bogibeel Bridge chu Krismas ni, December 25, khan a hawng.
PM Modi chuan ram chhunga lei sei ber Bogibeel Bridge hawn a ni ta chu thil chhinchhiah tlak tak a nih thu sawiin, he lei dawha rel tlan hmasa ber chu a vai liam nghal bawk a ni.
Bogibeel Bridge hi India rama lei sei ber a nih mai bakah Asia khawmualpuia rel tlan theihna lei sei ber dawttu a ni. He lei hi Brahmaputra lui chungah dawh niin, Assam-a Dibrugarh district leh Arunachal Pradesh ramri, Dhemaji district-a Silapathar a zawm a ni.
He lei dawh nan hian cheng vaibelchhe 5,900 zet sen a ni a, Atal Bihari Vajpayee chuan January 22, 1997 daih tawh khan he lei dawhna tur lungphum hi a phum a, April 21, 2002 khan Vajpayee kaihhruai sorkar hnuaiah lei dawh hna hi ṭan a ni. Congress karihhruai UPA sorkar chuan 2007 khan national project-ah a puang ve leh bawk.
Bogibeel Bridge hi km 4.9 zeta thui niin, rel leh motor tlan theihna a ni a, he lei dawh hmang hian Assam aṭanga Arunachal Pradesh kal chhung chu darkar li laiin a tlem phah a ni.
Union Minister of Health and Family Welfare Jagat Prakash Nadda chuan hmarchhak tana hmasawnna kawnga hunpui inṭanna a nih thu sawiin, inkalpawhna kawng a ṭhat phawt chuan hmasawnna chu a thleng dawn niin a sawi.
Union Railway Minister Piyush Goyal pawhin Bogribeel Bridge hmanga inkalpawhna tihṭhat hian hmarchhakah hmasawnna a thlen ngei dawn tih a sawi bawk a, Prime Minister Narendra Modi chuan hmarchhak tan Krismas thilpek hlu tak a pe niin a sawi bawk a ni. Piyush Goyal chuan Modi chu Vajpayee duhthusam a tihhlawhtlin vangin a fak bawk.
Chief Engineer Mohinder Singh chuan Km. 4.9-a thui lei an dawh chu India ramin European codes leh welding standard zawm veka welded bride a dawh puitlin awmchhun a nih thu sawiin, kum 120 vel chu pangai taka hman theih tura beisei a nih thu a sawi.
Lei hawnna-ah hian Assam Governor Jagdish Mukhi leh Chief Minister Sarbananda Sonowal te pawh an tel a ni.