Assam Accord Clause 6 kalpuina tur HCL din dawn

Union Cabinet chuan Nilaini khan Assam Accord Clause 6 kalpuina tur High Level Committee dinna tur chu a remti a, hemi hnuaiah hian Memo­randum of Settlement, 2003 leh Bodo community kaihhnawih thil hrang hrang te chu ngaihtuah tel a ni ang.

Union Home Minister, Rajnath Singh chuan a twitter-ah committee chuan Assam Accord Clause 6 kal­pui­na turah 1985 aṭanga hmalakna zawng zawng an enfiah dawn niin a sawi. 

Committee chuan mawhphurtu zawng zawng an biak dawn thu sawiin, Rajnath Singh chuan  State Assembly leh Assamese mipuite local body-a seat reservation siam chungchangah pawh ruahmanna an siam dawn niin a tarlang. 

Assam Accord Clause 6-ah hian Assam mipuite hnenah  constitutional, legislative leh administrative venhimna mumal tak, an cultural, social, linguistic identity leh heritage-te venhim leh chawisanna te pek an ni ang. 

Rajnath Singh chuan Assam mipuite leh an ṭawng te humhimna tura ruahmanna chu committee kutah a awm dawn tih sawiin, Bodo community kaihhnawiha buaipui tur hrang hrang te pawh Cabinet chuan an pawmpui tih a sawi bawk.

Bodo Accord hi 2003-a ziah kha niin India danpui, Sixth Schedule hnuaiah Bodoland Territorial Council siamna tur chungchang te a inziak a ni.