Meghalaya : CM-in party meeting a ko dawn

Meghalaya Chief Minister leh National People’s Party (NPP) national president, Con­rad K Sangma chuan BJP kaihhruai NDA sorkar aṭanga inhnukdawk tura nawrna nasa tak an hmachhawn mek chung­chang ngaihtuah turin party meeting an ko dawn tih a sawi.

Conrada Sangma chuan Citizenship (Amendment) Bill, 2016 pawm a ni chu thil pawi tak a nih thu sawiin, nasa taka an do zel tur thu leh, cabinet pawhin bill kalpuina tur zawng zawng chu dodal tura resolution an lo siam tawh thu a sawi a ni.

NPP national president chuan NDA aṭanga an inlak­chhuahna turah, thutlukna siam tur chuan hmarchhak hmun danga an party hruaitute nen an inbiak phawt a ngai tih a sawi. Hmarchhak state panga aṭanga an party hruaitute ko khawmin hemi chungchang hi an ngaihtuah ho thuai dawn tih a sawi bawk.

He thu hi Lok Sabha-in Citizenship Bill a pass hnu lawka a sawi a ni a, Bill pass a nih hma pawhin Bill hi pass a nih chuan an party chu NDA aṭangin an inhnukdawk dawn tih a lo sawi tawh bawk. 

Meghalaya sorkar hian a hma pawhin thuchhuah a lo siam tawh a, Citizenship (Amendment) Bill hi nasa taka an dodal dawn thu leh an pawm loh tur thu a lo sawi tawh a ni. NDA sorkar aṭangin BJP an paih dawn em tih zawhna chu chhangin Conrad Sangma chuan, "Thutlukna kan siam hmain party meeting kan nei hmasa phawt ang," tiin a sawi a ni. 

NPP leader leh Deputy Chief Minister ni bawk, Prestone Tynsong chuan Citiz­enship Bill pawm chu democracy palzutna a nih thu a sawi ve mek bawk a, Tynsong chuan hmarchhak mipuite ngaihdan leh rilru puthmang ngaihtuah miah loa Lok Sabha-a Bill pawm a ni chu thil mak tak leh pawi tak a nih thu a sawi.

Deputy Chief Minister chuan Bill-ah hian hmarchhak a huam tel lo ang tih emaw tel se a duh thu sawiin, mahse pawi tak maiin hetiang thu hi a inziak tel lo a ni, a ti. Me­ghalaya sorkar chuan Citizen­ship (Amendment) Bill chu a tawp thlenga an dodal  zel tur thu a sawi bawk.