Tripura-ah mi paruk kap hliam Internet shutdown nghal a ni

Thawhlehni-a hmar­chhak state hrang hranga Citizenship (Amend­ment) Bill, 2016 duh loh­na lan­tira bandh huai­hawtah, Tripura-a Dasaram Ji­rania-ah chuan buaina a chhuak a, Tripura State Rifle-te silai hmehpuahah mi parukin hliam an tuar. 

Hliam tuar te hi dam­dawi-in panpui nghal an ni a, an zinga mi pahnih chu an dinhmun a ṭha lo hle. Heng mi pahnihte hi an awm-ah silai mu hian a fuh a, GB hospital-ah sawn leh nghal an ni. An mahni phurtu ambulance chuan kalkawngah beih a tawk zui nia tarlan a ni bawk. 

Meghalaya-a Khasi Students’ Union-te chuan thilthleng hi an dem thu sawiin, Tripura police-te chetdan pawh an dem thu an sawi. 

Hetihlai hian hemi chungchangah hian thu dik lo lengvak venna turin mobile service zawng zawng tihtawp a ni a, internet pawh  darkar 48 chhung atan tihtawp lailawk a ni. 

Social media lamah bill dodaltu mi panga kah­hlum an nih thu a thang nia thudawn a awm vangin thuneitu lam chuan hetiang hian hma an la ta nia sawi a ni.