Manipur Congress MLA-ten Prime Minister hmuh an tum

Manipur-a Congress MLA-te chu nimin khan Delhi-ah kalin, Manipur ram chin humhim sak tura ngen turin prime minister Narendra Modi hmuh an tum. 

Sorkar laipui leh Naga helpawl, National Socialist Council of Nagalim-Isak Muivah (NSCN-IM) ten inremna an siam chuan Manipur ram a nghawng tel duh lohna lantirin, Manipur-ah hian pawl hrang hrangin nawrh an huaihawt mek a ni. 

Congress MLA-te hi chief minister hlui O Ibobi Singh-an a ho dawn a ni. Thawhlehni-a press conference a neihah, Ibobi Singh chuan sorkar laipuiin Manipur ram chin humhim sak a ni dawn tia a sawi fo chu thil thar a ni lo tih a sawi. "Central lama hruaitute hian tun hma lam pawhin thil dang dangah thu min lo tiam fo tawh a, mahse heng an thutiamte hi a taka kalpui a ni ngai lo," a ti. Naga peace talk chungchang PM sawipui tura kal, chief miniser N Biren Singh  kaihhruai sorkar team-te PM hmu loa an kir leh chu an dem tih Congress MLA-te chuan an sawi bawk.  

Chief minister hlui chuan sorkar laipui chuan Manipur inpumkhatna nghawng buai thei thil zawngin eng thutlukna mah a siam tur a ni lo tiin, Manipur-ah Bodo Territorial Council din tumna a awm nia sawi thawm te a awm thu a sawi. Congress palaite chuan PM chu hmuin, Naga peace talk chungchang bakah, territorial council emaw, autonomous body emaw din an duh chungchangte an sawipui tur thu a sawi. 

NSCN-IM-ten sorkar laipui nena an inbiaknaa an thil phut pakhat, greater Nagalim siam an tumnaah  an ṭhenawm state-a Naga te chenna bial chu an rinluh tel avangin state dangte ngaihven pawh a hlawh hle. A bikin Manipur mipuiten inremna siam tur hi an buaipui a, pawl hrang hrangin an state ram chin khawih danglam an remti dawn lo tih sawiin, nawrh pawh an huaihawt fo a ni. 

Manipur chief minister N.Biren Singh chuan state mipuite leh civil society organization hrang hrang chu chiai lo turin a ngen a, sorkar laipui chuan Naga hel nena inremna a tihfel hmain a ṭhenawm state-te pawh a berawn vek dawn a ni,  a ti. State mipuite chu sorkar ringtawk tura ngenin, Manipur tana harsatna siam zawngin Naga peace accord hi siam a ni dawn lo tih sorkar laipui chuan a lo sawi tawh a ni, a ti. 

CM chuan Manipur leilung fate chu lungrual leh hlim takin state chhungah an chengho thei tih sorkar chuan a ring nghet tlat tih sawiin, Manipur ram leh hnam ṭhendarh a ni ngai lo ang, tiin a sawi. Mipuite rilru tichiai lo a, inpumkhatna ṭha zawk siam a nih theihna tura sorkar hmalakna thawhpui turin Singh chuan media mite a sawm nghal bawk.