IPFT-in state hran phutin nawrh huaihawt a tum

Tripura-a rorellai, Bharatiya Janata Party (BJP) thawhpui, Indi­genous People's Front of Tripura (IPFT) chuan December thla tir hian Delhi-ah Tripura-a tribal puala state hran din phutna lantirin nawrh huaihawt an tum.

IPFT General Sec­retary leh party thupuangtu Mangal Debbarma chuan November thla tawpah an party hruaitu leh  member 500 vel chu Delhi-ah an kal dawn tih sawiin, December 1 emaw, 2 emawah nawrh huai­hawt an tum a ni, a ti. 

Mangal Debbarma chuan an party president leh state revenue minister Narendra Chandra Deb­barma, leh general sec­re­tary leh forest and tribal welfare minister Mevar Kumar Jamatia  kaihhruaiin party hruaitute  hian prime minister Narendra Modi, home mi­nis­ter Amit Shah, DoNER minister Jitendra Singh leh tribal affairs minister Arjun Munda-te an hmu dawn a, an thil phut chungchang hi an sawipui dawn tih a sawi. 

Kum 2009 aṭang khan IPFT hian Tripura Tribal Areas Autonomous District Council (TTAADC) chu state hrana siam an lo phut tawh a ni. TTAADC hian Tripura state zau zawng hmun thuma ṭhena  hmun hnih a huam pha a, mi maktaduai 12 an cheng a ni. 

Tripura aṭanga tribal puala state hran din phut­na hi IPFT thawhpui BJP baka eptu party, CPI-M leh Congress bakah Tripura-a tribal based party upa ber,  Indigenous Nationalist Party of Tripura te chuan na takin an dodal thung.