National Games thleng tur Meghalaya Rs vbc 170 pe dawn

Meghalaya sports and youth affairs minister Banteidor Lyngdoh chuan kum 2020-a National Games an thlen turah, sports infrastructure tih­changtlunna turin sorkar laipui chuan state sorkar hnenah cheng vaibelchhe 170 a pe dawn tih a sawi. 

Meghalaya hi hmar­chhak state zinga National Games thleng thei pa­thumna a ni dawn a, kum 1999-ah Manipur leh 2007-ah Assam ten an lo thleng tawh bawk a ni. Kum 2016 khan Meghalaya hian Assam nen South Asian Games an lo thleng dun tawh bawk a ni. 

Union minister for social justice and em­po­werment Thaawar­chand Gehlot chuan Meghalaya-ah hian pianphunga rual­banlote pualin inter­national standard Na­tional Sports stadium panga, cheng vaibelchhe 200 chuang sengin siam a nih tur thu a lo puang tawh bawk.

Department of sports and youth affairs, Megha­laya leh Hindustan Steel­works Construction Limited (HSCL) chuan state chhunga sports infrastructure siamna turin thawhdunna tur, memorandum of under­stan­ding (MoU) an ziak tawh a, HSCL hi Project Managment Consultant (PMC) a ni dawn a ni. 

Reliance Foundation founder-chairperson, Nita Ambani chuan Natio­nal Games puala state chhunga sports infra­structure siamna turin Meghalaya sorkar chu thawhpui an inhuam thu a lo sawi tawh bawk. Ambani chuan hemi atan hian sorkar nena inbiakna neih a, a theih anga puih an duh thu a sawi.