Defence minister-in AP a tlawh

Defence minister Rajnath Singh chuan Nilaini khan ni hnih cham turin Arunachal Pradesh-ah a zin a, defence minister a nih hnuah AP a tlawhna hmasa ber a ni.  

Singh hian nimin khan Tawang War Memorial leh Tawang Monastery te pawh a tlawh a, Maitree Diwas lawm­naah khuallian a ni nghal bawk. Maitree Diwas hi civil mi leh sipaiten inṭhianṭhatna leh inzawmna ṭha siamna atana buatsaih ṭhin a ni a, kuminah Tawang-a Gyalwa Tsangyang Gyatso High Altitude Stadium-ah a lawmna hun hi buatsaih a ni. 

Rajnath Singh hian vawiinah  China ramri, Line of Actual Control (LAC)-a sipai awmte hmuin,  ramri venhimna kawnga an hna thawh dante a enpui dawn bawk. LAC bul, Bum La-a border post a tlawh nghal dawn a, hemi hnu hian Lower Dibang Valley-a lei dawh a hawng nghal bawk ang. 

Bum La hi sea level aṭanga meter 4,500 chaunga awm a ni a, he hmun hi India tana hmun pawimawh tak a ni. Kum 1962 khan he hmun kaltlangin China sipai, People's Liberation Army khan India an rawn run a ni. Bum La hi India leh China sipaiten border personnel meeting (BPM) point pahnih an neih zinga pakhat a ni a, kumtin ram pahnih sipaite hian ṭum hnih meeting neiin, international border-a venhimna kalpui dan turah inremna an ziak ṭhin.