Tripura TSR-te Delhi-ah dah dawn

Tripura sipai ṭha, Tripura State Rifles (TSR) te chu India ram khawpui, Delhi-ah dah an ni dawn niin senior official chuan a sawi. TRS hi 2010 Commonwealth Games, New Delhi-a neihah khan duty tir an ni tawh a, state 16 chuangah inthlan laiin duty tir an ni tawh bawk. 

Inspector General of Police (TSR and Operations) GS Rao chuan, "TSR third battalion-te hi union home ministry hnuaiah awmin, New Delhi-ah dah an ni ang. Hei hi hun rei tak hnua Tripura force-te, inthlan duty  ni loa state pawn lama venhim hna thawk tura dah an nihna hmasa ber tur a ni," a ti. Commandant kaihhruai TSR battalion  hi Delhi-ah hian kum thum dah a ni dawn a, Delhi Police hnuaiah an thawk dawn tih a sawi. 

Police official chuan tun thla tawp lam emaw, December thla tir lamah emaw TSR sipai 1,000 velin Delhi hi an pan dawn a ni, a ti. Official chuan union home ministry leh Tripura sorkar-te nen an inbiakrawn hnuah,  TSR te hi Delhi-a dah tura tih an ni, tih a sawi. Delhi-a dah an nih chhunga an  hlawh, allowance leh senso dangte chu union home ministry-in a tumsak dawn a ni. 

Ministry of home affairs (MHA) ngen angin, November 30-December 20 inkara inthlan neihna tur, Jharkhand state-ah TSR sipai 370 duty tir an ni dawn bawk. October 21-a Haryana inthlan neihnah khan TSR sipai 900 chu tirh an lo ni tawh bawk a ni.