Impulse NGO Network-in chawimawina dawng

Sat Paul Mittal National Award Committee of Nehru Sidhant Kender Trust chuan Shillong-a Impulse NGO Network chu ‘SAT PAUL MITTAL NATIONAL AWARD’ 2019 hlan a ni. 

Impulse NGO Network (INGON)  hi hmarchhak bial chhungah midangte ṭanpuina hna thawk a, human traffic­king leh an nun tihchhiata awm turte venna kawnga a thawh hlawk avangin he chawimawina hi hlan a ni. Chawimawina hian pawisa fai Rs 2,50,000, memento leh citation a keng tel. November 11 khan Ludhiana-a Pandey Auditorium-ah award hi hlan a ni a, Impulse NGO Network aiawhin co-founder leh director pahnih, Rosanna Lyngdoh leh A.G.Kharbhih ten an dawng a ni. 

Sat Paul National Award hi  kum 1992-a Nehru Kender Trust-in an founder president Sat Paul Mittal hriatrengna atana a siam a ni. Sat Paul Mittal hi a hun puma mirethei leh chhumchhiate chawikanna tura thawktu a ni. India ram prime minister hmasa ber, Jawaharlal Nehru-an miretheite chawikanna tura a hmathlir neihte kalpuina turin kum 1983 khan nehru Sidhan Kender Trust a din a, he trust kaltlang hian miretheite chu ṭanpuiin, a bikin zirna lama hma an sawn theihna turin scholarship te an pechhuak a, midangte ṭanpuina kawnga thawk ṭhate chu kumtin award an pe ṭhin bawk. 

Impulse NGO Network hi kum 1993-a Hasina Kharbhih din a ni a, hmarchhak state pariat leh North Bengal-a mihring hmanga sumdawnna, human trafficking leh kumtling lo hnathawka chhawr luih, child labour doin a thawk a ni. A hnathawh avang hian chawimawina pawh eng emaw zat a lo dawng tawh a ni.