North East Industrial Corridor siam a ni dawn: Rajnath Singh

Defence minister Rajnath Singh chuan sorkar laipuiin North East Industrial Corridor siam a tum tih sawiin, hei hian hmarchhak bial mipuite tan hna tam tak a siamsak nghal dawn a ni, a ti. 

Ningania Arunachal Pra­desh-a Tawanga district-a 11th Maitree Diwas lawmna a hman­puinaah Singh chuan hei hi sawiin, "Arunachal Corridor chu India leh South East Asia te inkalpawhna pawimawh tak a ni dawn a,  trade leh tourism sector lamah hna tam tak a siamsak thei dawn a ni," tiin a sawi. Singh hian ni hnih awh, 11th Maitree Diwas hi Ningani khan chief minister Pema Khandu leh General Officer Commanding-in-Chief Eastern Command Lieutenant General Anil Chauhan te nen an hawng a ni. 

He event hi Indian Army, Tawang Civil Administration leh volunteer-te buatsaih niin, High Altitude Stadium-ah hman a ni.  Maitree Diwas hi civil mi leh sipaiten inṭhianṭhatna leh inzawmna ṭha siamna atana kum tina buatsaih a ni ṭhin. 

Rajnath Singh chuan sorkar laipui chuan Act East Policy hnuaia hmarchhak bial tihhmasawnna chu a dah pawimawh hle tih sawiin, prime minister Narendra Modi kaihhruaina hnuaia India chuan kawng hrang hrangin hma a sawn mek a ni, a ti. 

Singh chuan defence ministry-in Itanagar-ah Army Liaison Cell din a tum thu a sawi bawk. Minister chuan Arunachal Pradesh bakah hmarchhak pum chu India ram tan an pawimawh hle tih sawiin, sorkar laipui chuan border area-a chengte tan inkalpawhna ṭha zawk siam tumin a bei mek a ni, a ti. AP-in an culture leh hnam rohlute an vawngnun zel chu state dangte tan pawha entawn tlak a nih thu a sawi.