Manipur-ah Congress-in nawrh huaihawt

Manipur-a Manipur Pradesh Congress Committee (MPCC) leh party worker-te chuan Ningani khan Imphal-ah sit-in protest an huai­hawt a, sorkar laipui leh Naga helpawl, National Socialist Council of Nagaland-Isak Muivah (NSCN-IM) ten inbiakna an neih hnuhnun  ber inremna an siam dante mipui hriata puangzar turin sorkar an phut. 

Manipur deputy chief miniter hlui leh  AICC Central Working Commi­ttee (CWC) member Gaikhangam chuan, Manipur mipuite chuan union minister Amit Shah-an an state inpumkhatna chu humhimsak a ni dawn tia a tiamna chu an ring ngam lo tih a sawi. "Amit Shah hian thu min tiam mah se, tunhnaiah central security force-te chu Manipur-ah dah luh niin, sipai duty pawh dah belh an ni tawh bawk. He thil hian sorkar laipuiin thil thup a nei ngei tih a lantir a ni. Home minister thusawi hi lo rin ngawt theih a ni lo a ni," a ti. 

Gaikhangam chuan Congress party chu an state humhimna atan eng pawh hmachhawn turin a inpeih tih a sawi. BJP kaihhruai ṭangrual sorkara chief minister leh minister-te chuan union home minister thusawi behchhan chuan state mipuite rilru hnehsak an tum niin a sawi. Mahse state sorkar aiawhte chuan prime minister Narendra Modi an hmu ngam lo a, Naga peace talk chungchangah pawh Manipur tan thu an tiam tir ngam lo tiin a sawi. 

MPCC president M Okendro pawh­in thu sawiin, an state inpumkhat­na leh zahawmna humhim turin a tawp thlengin an bei zel dawn tih a sawi a, CM hlui O Ibobi Singh kaih­hruaiin state Congress MLA-te chuan Manipur ram humhimna turin New Delhi-ah campaign an nei mek a ni, a ti. Congress MLA-te hian AICC hruaitute leh eptu party dang hruaitute pawh an hmu tawh a, Naga peace talk-in Manipur a khawih tel lohna tura sorkar laipui nawrpui turin an sawm. Prime minister Narendra Modi leh union home minister Amit Shah-te pawh hmuh an tum bawk a ni.