Tripura HC chief justice thar lalut

Tripura High Court chief justice thar atan Gujarat and Bombay High Court judge hlui, justice Akil Adbulhamid Kureshi chu kar liam ta Inrinni khan lakluh a ni. 

Chief justice thar hi Tripura governor Ramesh Bais chuan Agartala-a old Raj Bhavan-a Durbar Hall-ah rinawmna thu a tiamtir a ni. Chief justice thar lakluh inkhawm hi chief minister Biplab Kumar Deb, deputy chief minister Jishnu Dev Varma, cabinet minister te leh judge pahnih Subhshish Talapatra leh Arindam Lodh ten an hmanpui. Political party  hrang hrang hruaitu, police senior officer, civil official leh para-military officer-te an tel bawk.

Thla ruk zet tihkhawtlai a ni hnuah, Union Ministry of Law and Justice hnuaia Department of Justice chuan kar kal ta khan Tripura High Court chief justice atan justice Kureshi hi a ruat a ni. Kumin May thla khan Supreme Court collegium chuan chief justice of India Ranjan Gogoi hnenah, justice Kureshi hi Madhya Pradesh High Court chief justice-a hlankai a lo rawt tawh a, mahse hei hi Department of Justice chuan a pawm lo. Mahse September 20 khan Collegium chuan a rawtna chu siamṭha lehin, Tripura High Court chief justice atana justice Kureshi ruatna pawm a ni ta a ni. 

Tripura rual hian Manipur leh Meghalaya-ah kum 2013, March thla khan high court hi din a ni. Sikkim chuan kum 1975 aṭang khan high court hran a lo nei tawh bawk. Hemi hma chuan hmarchhak state pasarih-te chu Gauhati High Court  hnuaiah vek an awm ṭhin.