CAB sawiho turin AP special cabinet meeting nei dawn

Arunachal Pradesh chief minister Pema Khandu chuan Citizenship (Amendment) Bill chung­chang sawiho turin vawiin hian special cabinet meeting a ko dawn. 

AP sorkar chuan CAB zirchiang tur hian consul­tative committee a lo din tawh a, vawiin meeting-ah committee report hi a sawiho dawn a ni. Pema Khandu chuan sorkar laipuiah CAB chung­changa AP sorkar ngaih­dan leh, rawtna a neihte a thlen dawn tih a sawi. "Consultative Committee chuan CAB chungchanga mi hrang hrangte ngaihdan te a zawt kual a, political party, community based organisation, NGO, zirlai leh ṭhalai pawlte ngaihdan an la vek a ni. Committee hian report hi a peih tawh a ni," a ti. He report hi an cabinet meeting-a sawiho a nih hnuah, Ministry of Home Affairs (MHA) ah rawtna an thehlut dawn tih a sawi. 

Consultative Committee-in state chhunga mimal leh pawl hrang hrang a kawmte chuan CAB hi an duh loh thu an sawi vek. Union home minister Amit Shah chuan CAB hian hmarchhak state-a Inner Line Permit system hman mek chu a nghawng buai dawn lo tih a lo tiam tawh tih Khandu chuan a sawi bawk. 

CAB hi BJP kaihhruai National Democratic Alliance (NDA) sorkar hmasaah khan Lok Sabha-ah pass ni mah se, Rajya Sabha-ah erawh a tlang hman lo a ni. Mahse BJP chuan CAB hi pass ngei a tum a, Parliament thlasik ṭhutkhawm neih turah pharh a tum a ni. He bill hi Pakistan, Bangladesh leh Afghanistan aṭanga India rama rawn pem lut, Muslim ni lo sakhaw dang zuitute hnena India khua leh tui, citizenship pek theihna tur a ni.