Manipur zirlai pawlten November 20 aṭanga nawrh huaihawt tum

Manipur-a zirlai pawl hrang hrang, All Tribal Students’ Union, Manipur (ATSUM), Kuki Students’ Organisation, General Headquarters (KSO GHQ) leh All Naga Students’ Association, Manipur (ANSAM) chuan Finance Department-in zirlaite tana Post Matric Scholarship for Scheduled Tribe (ST) pek tur a dan sak avangin November 20 aṭangin nawrh huaihawt an tum. Zirlai pawl pathumte chuan thuchhuah inṭawm siamin, Manipur mi, state pawn lama lehkha zirte hnena academic session 2018-2019 atana post matric scholarship pekchhuahna thupek siam a nih loh chuan lungawi lohna lantir an tum thu an sawi. 

Zirlaite chuan ST zirlaite tana post matric scholarship, first instalment chu thla 4/5 liamta khan pek an ni tih sawiin, second instalment hi state pawn lama college zirlaite hnenah pek tur  ni mah se finance department chuan a la dansak tih an sawi. "Zirlai tam tak, an scholarship lak hmanga college fee, examination fee leh mamawh dang pe an awm a ni. Semester examination neih hma ngeiin an fee-te hi pe fel tura tih an ni ṭhin a, hei vang hian scholarship an lak loh chuan zirlai eng emaw zat, exam theih loh phah an awm dawn a ni," tiin an thuchhuahah an tarlang. 

Post matric scholarship second instalment atan hian Sep­tember thla khan ministry chuan cheng vaibelchhe 28 a pe tawh a, hei hi zirlaite hnena sem mai an beisei laiin tun thlengin pek an la ni lo a ni, tiin zirlai pawlte chuan an sawi. Finance department chu zirlaite dinhmun ngaihtuah pui tawk lohah an puh.