Modi leh Shah zin hunah AASU in nawrh huaihawt tum

All Assam Students' Union (AASU) chuan prime minister Narendra Modi leh union home minister Amit Shah-ten an state an tlawh hunah BJP kaihhruai sorkar laka lungawi lohna lantira nawrh huaihawt an tum tih an sawi. 

AASU president Dipanka Kumar Nath chuan BJP kaihhruai sorkar chuan Assam Accord chu a ngaihthahin, state mipuite lakah Citizenship Amendment Act (CAA) a hmansak lui niin a sawi. "Sorkar laipui leh state sorkar hian Assam leilung fate venhimna leh chawikanna tur, Assam Accord Clause 6 hi a taka kalpui tumna an nei lo. Centre-a BJP kaihhruai sorkar chuan dan loa state chhunga ram dang mi awmte chu thawnchhuah tura hma lak aiin, Bangladesh mi dan kalha awmte chu 'Hindu' sakhua nih vangin khua leh tui nihna pek a tum zawk a ni," a ti. Bangladesh nena inrina hung vel tura an intiamna pawh an tihhlawhtling lo tih a sawi bawk. 

Chief minister Sarbananda Sonowal chu Assam Accord Clause 6 kalpuina tura hmalaknaah a hlawhchham niin Nath chuan a sawi bawk a ni. PM Modi-a'n Sivasgar-a Jerenga Pathar tlawh a tum ni, January 23-ah ASSU hian district leh regional unit tinah lungawi lohna lantirin badge dum an bel dawn a, punkhawm an tum bawk. Hei bakah January 24-a Amit Shah-a'n an state a tlawh hunah pawh AASU unit tinah flag dum zarin, CAA copy an hal dawn bawk a ni. 

AASU general secretary  Shankar Jyoti Baruah chuan PM Modi chuan Jerenga Pathar a tlawh hunah hian BJP kaihhruai sorkarin dan loa Bangladesh mi awmte thawn kir an nih chungchangah report a pe ngei tur a ni tiin, Amit Shah chuan CAA dodalna lantira ram tana nunna petute a hmusit hle a ni, a ti bawk. Shah chuan state miputie  hennah sorkarin Assam Accord Clause 6 a hman loh chhan pawh a hrilhfiah ngei tur a ni, a ti.