Sikkim-in 2022 'Visit Sikkim' kumah hmang dawn

Sikkim sorkar chuan Covid-19 hripui leng vanga an state tourism industry dinhmun tlahniam tuai thar a, khualzin tam zawk hip luh an nih theihna atan kum 2022 chu 'Visit Sikkim' kumah a hmang dawn. 

Chief minister PS Tamang (Golay) chuan Thawhṭanni khan Travel Agents' Association of Sikkim (Tass) in hun a buatsaih a hmanpuinaah he thu hi sawiin, state tourism department leh Tass chuan tourism market tihlen leh tihchangtlunna tura hmalakna dan an duang dawn a ni, a ti. 'Visit Sikkim 2022' chu tourism lam chawilarna atan hman a ni dawn a, hemi kum hian khawvel ram hrang hrang aṭangin khualzin hip luh an tum tih a sawi a ni.

CM chuan hripui leng vangin kum 2020 khan tourism industry chuan sum tam tak a hloh tih sawiin, kuminah pawh sum lakluh hi a la tlahniam hle a rinawm thu a sawi bawk. Mahse a kaihhruai sorkar chuan theihtawp a chhuah zel dawn tih sawiin, a theih angin a pui zel dawn a ni, a ti. 

Kum 2022-ah sor­kar chuan tourism  kaihhnawiha thil hrang hrang buatsaih a tum dawn a, mega festival pawh neih tum a nih thu CM chuan a sawi. "Gangtok chauh kan thlur bing dawn lo a, district hrang hrangte pawh khualzin tam zawkin an tlawh theihna turin hma kan la ang," tiin a sawi. 

Covid hripui len hma, kum 2019 khan mi nuai sarih vel chenna, Sikkim state tlawhtu hi ramchhung hmun dang aṭangin khualzin nuai 14 chuang leh, ram dang aṭangin nuai 1.5 vel an awm a ni.