AP ram chhungah China-in khua din
China chuan Arunachal Pradesh ram chhungah thingtlang khua a din a, satellite image aṭanga a lan danin he khuaah hian chenna in 101 vel a awm.
Thingtlang khaw din thar hi Upper Subansiri district-a Tsari Chu lui kamaha ni a, he hmun hi ramri aṭanga India ram chhung km 4.5 vela awm a ni. Official map-ah chuan he ram hi India ram chinah awm mah se kum 1959 aṭang khan China lam thununna hnuaiah a awm thung. A hma chuan China hian military post chauh a dah ṭhin a, mahse satellite image tihchhuah hnuhnung ber, kum 2020, November 1-a tihchhuahah chuan khua hi din a lo ni tawh a ni. Hemi hma, kum 2019, August 26-a image tihchhuahah chuan khua hi din a la ni lo a, nikum chhungin in 100 chuang awmna khua hi a lo din a ni.
Nikum November thla khan Arunachal Pradesh BJP MP, Tapir Gao chuan Lok Sabha-ah China-in an state chhung an luh thu hi a lo sawichhuak tawh. Thawhṭannia NDTV-in a kawmnaah, Gao chuan China hian upper Subansiri district lui dungah India ram chin km 60-70 vel an lut tawh niin a sawi a, lui dungah hian kawngpui pawh an siam mek a ni, a ti.