Manipur CPI-in Union budget 2020-21 duhlohna lantir

Communist Party of India (CPI) Manipur State Council chuan union budget 2020-21 duh loin, Pathianni khan lungawi lohna an lantir. 

Left party hian union bud­get thar hi mipuite harsatna nasa zawk thlentu tur nia sawiin, February 12 aṭang khan rampum huapin lungawi lohna a lo lantir tawh a ni. 

Imphal Irawat Bhavan-ah lungawi lohna lantirin, CPI Manipur State Council secretary, L. Sotinkumar chuan budget 2020-21 ah chuan mipuite tana ṭha lo tur thil tam tak a awm a ni, a ti. 

Union budget thar hian economy lam buaina a thlen dawn a, hei hian mipui nawl­puite tan harsatna nasa zawk a thlen dawn a, he budget hi mi hausa leh BJP nena inhnaivai sumdawng liante chawikanna tura siam a ni, tiin Sotinkumar chuan a sawi. 

Health, agriculture, urban development, MGNREGA, social welfare, ST leh SC tana sum dah chu budget tharah hian nasa taka tihhniam a nih thu a sawi bawk. Sotinkumar chuan, "Sorkarin GDP 10% a ṭhang tura a target a siam hi a hlawhtling dawn lo, hei hi an duhthusam mai a ni," a ti. 

CPI hruaitu chuan Narendra Modi kaihhruai BJP sorkar a din hnuah, kuthnathawktute tana ṭha lo tur policy eng emaw zat kalpui a ni tawh tiin a sawi.