Assam Accord: Mi paliin MHA panel siama member nih duh lo

Union Cabinet chuan Assam Accord clause 6 kalpuina tur atan high-level committee din tura thutlukna a siam hnuah Home Ministry chuan HLC hi a din a, mahse HCL member tura an ruat zinga mi pali chuan ruat an nihna hi an hnawl.

HLC-ah hian member pakua ruat chhin niin heng zinga pali hian ruat an nihna hi an pawm duh lo a ni.

Home Ministry in member tura a ruat zinga mi Nagen Saikia leh Rong Bong Terang,  Dhirendra Nath Bezbaruah leh All Assam Students Union (AASU)-te chuan committee member tura ruatna hi an hnawl tih an sawi.

Heng member atana ruat pali-tena an ruatna an hnawl chhan hi Citizenship (Amendment) Bill 2016 Lok Sabha-a pawm a nih vanga ngaih a ni. 

Nagen Saikia chuan clause 9 committee chu cabinet din committee a nih thu leh bill a nih loh thu a sawi. Hemi a nih avang hian sorkar laipuia sorkar lai an inthlak hunah chuan committee rawtna thlen chuan awmzia a nei tawh dawn lo a, a hma chuan committee-a tel ngei hi tum mah se tunah chuan a tel duh ta lo niin a sawi. Asom Sahitya Sabha president hlui Saikia chuan committee hmachhuan hian sorkar chuan Citizenship Bill chu pawm a tum niin a sawi bawk.

Asom Sahitya Sabha hruaitu hlui tho Rong Bong Terang chuan Assam Accord ziaktu ber AASU in committee member nih an duh loh chuan a tan chuan tel a ngai lo nghal niin a sawi.

Anni bakah hian Home Ministry chuan AASU aiawh pakhat committee-ah hian tel tura a ruat chu AASU hian hnawlin Constitutional bill hnawl a nih hma chuan an tel dawn lo tih an sawi bawk a ni. 

Journalist senior leh The Sentinel editor hlui Bezbaruah pawhin committee-ah hian a tel theih dawn loh thu sawiin, sorkar in a ruatna chu lawmawm hle mah se a kum a upat tawh avang leh inhnamhnawihna neih tlem tawh a duh avangin a hnawl tih a sawi.

Home Ministry in HLC a dinah hian member pakua awmin IAS officer retired M.P. Bezbaruah chu Chairman atan a ruat a ni.