Citizenship Bill in an state huam lohna turin Manipur Cabinet-in sorkar laipui ngen dawn

Manipur State Cabinet meeting Ningani-a neih chuan Citizenship Amendment Bill chung­chang ngaihtuahin sorkar laipui hnenah Bill hian Manipur huam tir ve lo tura ngen turin thutlukna an siam.

Meeting chuan sorkar laipui hnenah Manipur People’s Protection (MPP) Bill, 2018 pawm­pui tura ngen an tum bawk.

Ningani-a meeting hi Chief Minister N. Biren Singh chuan kaih­hruaiin Lok Sabha in Citizenship Bill a pawm chungchang ngaihtuah tura inhmukhawm an ni ber. 

Chief Minister office in thuchhuah an siamah Cabinet chuan Manipur population chu an ngai thutak hle tih sawiin India population-ah pawh 0.2% chiah an nih avangin ram leilung fate humhim chu a pawimawh an tih thu an tarlang.

State Assembly in a siam Manipur People’s Protection Bill (MPP) hnuaiah hian Manipur mipuite leh an duhdante chu humhim a ni thei dawn tih tarlang bawkin Citizenship Bill chu ram leilung fate tan chuan pawm theih a nih loh avangin cabinet chuan sorkar laipui hnenah MPP pawm turin leh Citizenship Bill-a Manipur telh ve lo turin an ngen dawn tih an tarlang a ni. 

Hetihlai hian Manipur Pradesh Congress Co­mmittee (MPCC) chuan BJP kaihhruai Mani­pur sorkar chu Bill chung­changa hma la tur hian an ngiat thu an sawi.

Congress hruaitu leh CM hlui ni bawk Okram Ibobi chuan Manipur mipuite leh Congress party chuan Citizenship Amendment Bill chuan MPP a luahlan dawn em tih an hriat duh thu sawiin, Manipur-a political party zawng zawngte chu inlungrual taka mipuite duhdan puitlin a nih theih nana thawhpuiah a sawm a ni.